Размер шрифта: A A A
Цвет сайта: A A A A

09.08.2018 17:33 Чоп этиш версияси

Тўрт ойда ис газидан 58 фуқаро заҳарланиб вафот этган

Тўрт ойда ис газидан 58 фуқаро заҳарланиб вафот этган
Пойтахтимизда “Ўзтрансгаз” акциядорлик жамияти фаолиятида янгиланиш, модернизация ва истиқболли ҳамкорлик масалалари” мавзусида республика илмий-амалий анжумани ўтказилди.

“Ўзтрансгаз” акциядорлик жамияти томонидан ташкил этилган анжуманда Ўзбекистон Республикаси Вазирлар Маҳкамаси ҳузуридаги “Саноатгеоконтехназорат” давлат инспекцияси, ИИВ Ёнғин хавфсизлиги бош бошқармаси, Фавқулодда вазиятлар вазирлиги вакиллари ва соҳа ходимлари иштирок этди.

Айни пайтда “Ўзтрансгаз” акциядорлик жамияти томонидан барча ҳудудий газ таъминоти идораларининг фаолиятини яхшилаш борасида самарали чора-тадбирлар ишлаб чиқилиб, амалиётга жорий этилмоқда. Тизим тасарруфидаги ташкилот ҳамда корхоналар фаолиятини тубдан яхшилаш механизмлари тобора ўзгариб бораётир. Жумладан, аҳолига суюлтирилган ҳамда табиий газни ўз вақтида етказиб бериш, куз-қиш мавсумига пухта тайёргарлик кўриш, газ қувурларини мукаммал таъмирлаш дастурларини муддатида бажариш ва газ тақсимлаш пунктларининг намунавий ҳолатдалигини доимий назорат қилишга алоҳида эътибор қаратилмоқда.

Бироқ, олиб борилаётган тадбирларга қарамасдан аҳоли ўртасида куз-қиш мавсумининг кириб келиши билан ностандарт, қўлбола ва автоматик бошқарув тизимига эга бўлмаган иситиш қозонларидан фойдаланиш ҳамда газ тармоқларига ноқонуний уланиш ҳолатлари кўплаб учрамоқда.

Ачинарлиси, иситиш жиҳозларидан фойдаланишда дудбурон ва вентиляция каналларининг созлигига эътибор берилмаётганлиги фуқароларнинг жабр кўришига ва бевақт вафот этишига сабаб бўлмоқда.

Жумладан, ўтган йиллар куз-қиш мавсумида дудбуронлари носоз бўлган иситиш қозонлари ва ускуналардан фойдаланилиши натижасида кўплаб инсонларнинг ис газидан заҳарланиш ҳолатлари рўй берган.

2017 йилда мамлакатимиз бўйича 81 та ис газидан заҳарланиш ҳолатлари қайд этилган бўлиб, унда 83 та фуқаро вафот этган, 110 киши жабрланган, 2018 йилнинг январь-апрель ойларида содир бўлган ис газидан заҳарланиш ҳолатларида 54 нафар фуқаро жабрланган, 58 фуқаро вафот этган.

Ўзбекистон Республикаси Вазирлар Маҳкамасининг 2017 йилнинг 24 октябрдаги “Аҳоли ўртасида ис газидан заҳарланиш ҳамда ҳаво-газ аралашмасининг чақнаши билан боғлиқ фавқулодда вазиятларнинг олдини олишга қаратилган профилактик тадбирларни кучайтириш бўйича комплекс чора-тадбирлар дастури”да белгиланган вазифаларни амалиётга тўла қонли татбиқ этиш мақсадга мувофиқдир.

Дастурга асосан, ҳар йили 1 ноябрга қадар аҳоли хонадонлари, ижтимоий соҳа объектларидаги газ ва иситиш жиҳозлари, дудбуронлари ҳамда вентиляция тизимларининг куз-қиш мавсумидан олдин техник кўрикдан тўлиқ ўтказиш белгилаб қўйилган.

Шунингдек, Ўзбекистон Республикаси Вазирлар Маҳкамасининг 2018 йил 12 январдаги 22-сон қарори иловасига асосан аҳоли билан табиий газ етказиб бериш бўйича тузилган шартномаларда аҳолининг дудбурон ва вентиляция каналларини доимий соз ҳолатда сақлаши ва ўз вақтида кўрикдан ўтказиши белгилаб қўйилган.

Табиий газ ҳамда ис гази билан заҳарланиш ҳолатлари иситиш тизимига табиий газни улашда меъёрий талабларга риоя этмаслик ҳамда фойдаланишда техника хавфсизлиги қоидаларига амал қилмаслик, иситиш учун мўлжалланган печлар ҳамда мўриларнинг соз ҳолатда эмаслиги, яхши тозаланмаганлиги боис юзага келади. Жойларда газдан хавфсиз фойдаланиш юзасидан аҳоли ўртасида кенг тарғибот ишларини ташкил этиш ва бугунги кунда кўп учраётган ис газидан заҳарланишдек салбий ҳолатларнинг олдини олиш долзарб масала.

Шундан келиб чиқиб, маърузачилар ис гази ва ҳаво-газ аралашмаси чақнаши натижасида заҳарланиш, шунингдек, нохуш ҳолатларнинг олдини олиш борасидаги ишларга жиддий ёндашиш зарурлигини уқтириб ўтди. Анжуманда бу борадаги ишлар самарадорлигини ошириш юзасидан кўп томонлама ҳамкорликни янада кучайтиришга келишиб олинди. Кенг қамровли тадбирларни ҳудудий тузилмаларда ҳам амалга ошириш масаласи алоҳида режага киритилди.

Дарҳақиқат, куз-қиш мавсумининг кўнгилдагидек ўтиши бугунги тайёргарлик ишларига бевосита боғлиқ. Қишга тайёргарлик ишларини нафақат газ таъминоти корхоналари балки, истеъмолчилар ҳам масъулият билан бажариши лозим.

“Ўзтрансгаз” АЖ истеъмолчиларга белгиланган тартиб асосида табиий ҳамда суюлтирилган газни узлуксиз, хавфсиз етказиб бериш ишларини ижобий ҳал этган. Ишлаб чиқилган механизм энг чекка ҳудудларни қамраб олгани билан аҳамиятли бўлмоқда. Айни пайтда мамлакатимиз бўйича 3 миллион 353 минг хонадонга табиий газ, 3 миллион хонадонга эса суюлтирилган газ етказиб берилмоқда. Истеъмолчилар ўртасида табиий ва суюлтирилган газдан хавфсиз фойдаланиш бўйича 330 минг 589 та эслатма, 4 минг 182 маротаба суҳбат, радио ва аҳоли кўп йиғиладиган жойларда мингдан зиёд эшиттириш, телевидение орқали 396 маротаба чиқиш ва видеороликлар ишлаб чиқилиб, тарғибот ишлари доимий равишда олиб борилмоқда.

Анжуман иштирокчилари ўзларини қизиқтирган саволларга мутахассислардан жавоб олди.

Муҳайё Тошқораева, ЎзА
6 388