Тўрт дона балиқ – 17 миллион 840 минг сўм
![](https://cdn.uza.uz/2021/01/02/22/13/hDtEP0SswC1oz43mN0TFBjIisylvrxMb_normal.jpg)
Давлат экология қўмитаси томонидан Амударёда жорий йил 12 мартдан 31 майгача балиқларни саноат мақсадида овлашга тақиқ ўрнатилди.
Давлат экология қўмитаси томонидан Амударёда жорий йил 12 мартдан 31 майгача балиқларни саноат мақсадида овлашга тақиқ ўрнатилди. Шунингдек, май ойи – “Браконьерликка қарши кураш ойи” деб эълон қилинди.
Хоразм вилояти экология ва атроф-муҳитни муҳофаза қилиш бошқармаси Биохилмахиллик ва муҳофаза этиладиган табиий ҳудудлар масалалари бўлими давлат инспекторлари томонидан олиб борилаётган назорат тадбирлари давомида Ҳазорасп тумани Тошсақа блок постида велосипедда ҳаракатланиб келаётган фуқаро У. Х. ёнида 4 дона Ўзбекистон Республикаси “Қизил китоби“га киритилган “Орол сўзан“ балиғи борлиги аниқланди.
Фуқаро ушбу балиқларни Амударёдан ноқонуний равишда овланганлигини билдирганлиги сабабли, суриштирув тергов ишларини қонуний тартибда олиб бориш учун ҳужжатлар тегишли тартибда Ҳазорасп туман ички ишлар бўлимига ўтказилди.
![photo_2020-05-15_17-49-02.jpg photo_2020-05-15_17-49-02.jpg](/upload/medialibrary/b78/photo_2020_05_15_17_49_02.jpg)
Балиқларни ноқонуний овланиши натижасида Ўзбекистон Республикаси Вазирлар Маҳкамасининг 2014 йил 20 октябрдаги 290-сонли қарорининг “Ҳайвонот дунёси объектларидан фойдаланиш ва ҳайвонот дунёси объектларидан фойдаланиш соҳасида рухсат бериш тартиб — тамойилларидан ўтиш тартиби тўғрисида“ги Низомининг 14-иловасига асосан табиатга етказилган зарар миқдори 17 миллион 840 минг сўмни ташкил қилади.
Браконьерликка қарши кураш ойлиги давом этмоқда.