ЎзА Ўзбек

17.08.2018 10:55 Чоп этиш версияси

Республика олий таълим муассасаларига давлат грантининг минимал ўтиш бали 68,0 балл этиб белгиланди

Республика олий таълим муассасаларига давлат грантининг минимал ўтиш бали 68,0 балл этиб белгиланди

2018/2019 ўқув йилида олий таълим муассасаларига қабул бўйича Ўзбекистон Республикаси таълим муассасаларига ўқишга қабул қилиш бўйича Давлат комиссияси мажлисининг қарори тўғрисида қисқача маълумот Бош вазир ўринбосари Азиз Абдуҳакимовнинг Фейсбукдаги саҳифасида эълон қилинди.

 2018 йил 16 августда  қабул қилинган Ўзбекистон Республикаси таълим муассасаларига ўқишга қабул қилиш бўйича Давлат комиссияси мажлисининг баёнига кўра, республика олий таълим муассасаларига давлат грантининг минимал ўтиш бали 68,0 балл (энг юқори ўтиш бали 189,0 баллнинг 36%), тўлов-контрактнинг минимал ўтиш бали 56,7 балл (энг юқори ўтиш бали 189,0 баллнинг 30%) этиб белгиланди.

Бунда олий таълим муассасаларига ногиронлиги бўлган шахсларни қўшимча давлат гранти асосида ўқишга қабул қилиш амалдаги қонунчиликка асосан амалга оширилади.

Иккинчидан, тўлов-контрактнинг минимал ўтиш бали 56,7 балл эканлигини инобатга олиб, Давлат тест маркази 2 кун муддатда тест синовлари натижалари қайдномаларини қайтадан кўриб чиқиб, қабул квотаси тўлмаган таълим йўналишларининг қабул чегарасини туширади ҳамда ўрнатилган тартибда қайдномаларни чоп этиб, олий таълим муассасаларига етказади.

Учинчидан, оширилган тўлов-контракт бўйича 56,7 баллдан юқори балл тўплаган абитуриентлар учун Ўзбекистон Республикаси таълим муассасаларига ўқишга қабул қилиш бўйича Давлат комиссиясининг 2018 йил 13 августдаги 5-сон баёнининг 1-иловаси билан тасдиқланган оширилган тўлов-контракт миқдори 56,7 баллдан кам балл тўплаган абитуриентлар учун оширилган тўлов-контракт миқдорининг 2 баробари этиб белгиланди.

Бундан ташқари, тест синовлари натижаси бўйича етарли балл тўпламаган ва оширилган тўлов-контракт асосида ўқиш истагини билдирган абитуриентларга оширилган тўлов-контрактнинг миқдори (баробари) кам бўлган таълим йўналишини танлаш имконияти берилди. Бунда, абитуриент тест топширган фанлар мажмуасининг (фан блокларининг ўрни) мослиги ҳамда унинг доимий яшаш жойи ва ҳужжат топширган олий таълим муассасаси жойлашган ҳудуд мезон сифатида белгиланди.

Оширилган тўлов-контракт асосида абитуриентларни ўқишга қабул қилишда олий таълим муассасаларининг илмий-педагогик ҳамда моддий-техник имкониятлари инобатга олинади.

 

 


9 565