Давлатимиз раҳбарининг “Ҳар бир оила – тадбиркор” дастурини амалга ошириш тўғрисида”ги қарори катта аҳамиятга эга бўлганини эришилган натижалардан ҳам кўриш қийин эмас.

Давлатимиз раҳбарининг “Ҳар бир оила – тадбиркор” дастурини амалга ошириш тўғрисида”ги қарори катта аҳамиятга эга бўлганини эришилган натижалардан ҳам кўриш қийин эмас. 

Қарор асосида ҳар бир оиланинг бизнес билан шуғулланиши ва барқарор даромад манбаига эга бўлиши учун зарур шарт-шароитлар яратишга янгича ёндашилди. Мамлакатимизнинг ҳар бир шаҳар, туман ҳамда олис, шароити оғир ҳудудларда тикувчилик, ҳунармандчилик, паррандачилик, балиқчилик, асаларичиликни ривожлантириш, енгил конструкцияли иссиқхоналар қуриш, маиший хизматларни йўлга қўйиш ва тадбиркорликни бошқа йўналишларига имтиёзли кредитлар ажратилмоқда.

Рақамларга эътибор қаратадиган бўлсак, ўтган йили “Ҳар бир оила – тадбиркор” дастури асосида республика миқёсида тижорат банклари томонидан 306 218 нафар фуқарога жами 5 трлн. 856,3 млрд. сўм миқдорда имтиёзли кредит ажратилган. Демакки, 306 мингдан ортиқ янги иш ўрни яратилган ёки шунча оиланинг фаровонлиги янада яхшиланишига эришилган.

Бугунги замоннинг талаби ўзгача, шароитлар бошқача. Йилига ярим миллион нафардан кўпайиб бораётган республикамиз нуфузи, рўзғорининг бутлигига эришиш, одамларни, айниқса, ёшларни иш билан таъминлаш масаласини ҳал этишни ҳар бир оиланинг тадбиркорлик ресурсларидан фойдаланмай туриб бажариш мушкул.

Тижорат банклари томонидан бунинг учун энг кам иш ҳақининг юз эллик бараваригача, белгиланган тартибда давлат рўйхатидан ўтган кичик тадбиркорлик субъектларига фаолиятни ривожлантириш учун энг кам иш ҳақининг минг бараваригача, тадбиркорлик субъектларининг инвестициявий лойиҳалари учун эса энг кам иш ҳақининг минг бараваридан ортиқ миқдорда кредитлар ажратилмоқда.

Яна бир нарсани алоҳида таъкидлаш керакки, оилавий тадбиркорлик билан шуғулланиб келаётганлар ҳудудларда тузилган ишчи гуруҳларнинг катта ёрдами тегаётганини таъкидлашмоқда. Хусусан, ҳудудий ишчи гуруҳлар ҳар бир хонадонни ўрганиб, аҳолининг тадбиркорлик билан шуғулланиши учун шароит яратиш, яъни бизнес-режани тузишдан тортиб, кредит олиш, маҳсулотни ишлаб чиқариш ва уни реализация қилишгача бўлган жараёнда аниқ манзилли ёрдам кўрсатишмоқда.

Умуман айтганда, қарор ҳар бир оиланинг тадбиркорлик билан шуғулланиши ҳамда барқарор даромад манбаига эга бўлиши учун зарур шарт-шароитларни яратиш йўлида катта қадам бўлди.

Энди бу борадаги ишлар янги босқичга кўтарилиши керак. Сабаби, давлатимиз раҳбари жорий йилнинг 24 январдаги Мурожаатномада бу масалага алоҳида тўхталди. Таъкидланганидек, “камбағалликни камайтириш – бу аҳолида тадбиркорлик руҳини уйғотиш, инсоннинг ички куч-қуввати ва салоҳиятини тўлиқ рўёбга чиқариш, янги иш ўринлари яратиш бўйича комплекс иқтисодий ва ижтимоий сиёсатни амалга ошириш, демакдир.

Жойлардаги ижтимоий муаммоларни ҳал этишга оид тадбиркорлик ташаббусларини, айниқса, ёшлар ва аёллар тадбиркорлигини қўллаб-қувватлашга устувор аҳамият бериш зарур. Шу мақсадда аҳоли ва тадбиркорларга, микромолия хизматлари ва молиявий ресурсларга, давлат харидларига кенг йўл очиб берилади. Бундай чоралар орқали одамларимизда тадбиркор бўлишга иштиёқ ва ишонч ортади, улар кўпроқ даромад олишга интиладиган бўлади”.

Умуман олганда, “Ҳар бир оила — тадбиркор” Дастури қисқа фурсатда ўз натижаларини берди. Буни юқорида келтирилган рақамлар, яратилган кўплаб иш ўринлари тасдиқлайди.

Лекин биз депутатлар бу жараёнда томошабин бўлмаслигимиз керак. Кредитлар ҳақиқатдан ҳам муҳтожларга ажратиляптими? Олинган кредитлар асосида йўлга қўйилган ишлар қандай кетяпти? Очилган иш ўринлари барқарорлиги сақланиб қолаяптими? 306 218 нафар фуқарога ажратилган 5 трлн. 856,3 млрд. сўмлик кредит ҳаётда қандай самара беряпти?..

Биз жойларга чиққанда, умуман, ҳар кунлик иш фаолиятимизда шу саволларга жавоб топиш ҳақида қайғуришимиз зарур.

Аваз ЎРИНБОЕВ,

Олий Мажлис Қонунчилик палатаси депутати,

Халқ демократик партияси фракцияси аъзоси