ЎзА Ўзбек

12.10.2019 Чоп этиш версияси

Наманган ва Андижон вилоятларининг айрим туманлар чегаралари ўзгартирилади

Наманган ва Андижон вилоятларининг айрим туманлар чегаралари ўзгартирилади

Олий Мажлис Сенати йигирма учинчи ялпи мажлисида Наманган вилоятининг Наманган шаҳри, Тўрақўрғон, Косонсой, Наманган ва Янгиқўрғон туманлари, шунингдек, Андижон вилоятининг Хонобод шаҳри ва Қўрғонтепа тумани чегараларини ўзгартириш тўғрисидаги масалалар кўриб чиқилди.

Бу масала биринчи навбатда ҳудудларнинг ижтимоий инфратузилмасини ривожлантиришда муҳим аҳамият касб этиши таъкидланди.

Муҳокамага ҳавола этилган масалаларнинг ижобий ҳал этилиши ҳудудларнинг ўзига хос хусусиятларидан келиб чиқиб тасдиқланадиган маҳаллий дастурларни тўлиқ рўёбга чиқаришда муҳим аҳамият касб этиши қайд этилди. Маълумки, мамлакатимизнинг изчил тараққиёти Наманган ва Андижон вилоятларида ҳам улкан ўзгаришларга замин яратди. Шаҳару туманларда кенг кўламли бунёдкорлик ишлари ва истиқболли инвестициявий лойиҳалар амалга оширилмоқда.

Хусусан, Наманган шаҳрининг марказий қисми ва асосий кўчалари шаҳарнинг “Бош режаси”га асосан қайта қурилиши натижасида кейинги йилларда шаҳарга туташ бўлган қўшни Косонсой, Наманган ва Янгиқўрғон туманлари ҳудудларидан жами 1 минг 39 гектар ер майдонларига шаҳар марказида уй-жойлари бузилишга тушган аҳоли учун янги турар жой мавзеларини барпо этиш учун ажратиб берилди. Мазкур ҳудудлардаги аҳоли ва ўзини-ўзи бошқариш органлари маъмурий бошқарув тизими бўйича Наманган шаҳрига бўйсинувчи бўлгани ҳолда, ер майдонлари ҳозирга қадар туманлар ҳудудига тегишлидир. Бу эса ўз навбатида коммунал хизматлар кўрсатиш, ҳудудларни комплекс ривожлантириш, йўллар ва коммуникацияларни қурилишида бир қатор муаммоларни келтириб чиқармоқда.

Бундан ташқари, таклиф этилаётган ўзгариш натижасида Наманган шаҳрининг ижтимоий-иқтисодий салоҳиятини ошириш ва аҳолига қулай шароит яратиш, жумладан, шаҳар ҳудудига ўтказилаётган ер майдонларида янги турар жой комплекслари, ижтимоий ва маданий-маиший объектлар, саноат ва ишлаб чиқариш корхоналари қурилиши ҳамда муҳандислик коммуникацияларини янада ривожлантириш режалаштирилган.

Шу сабабли, Наманган шаҳри таркибига Тўрақўрғон, Косонсой, Наманган ва Янгиқўрғон туманларининг жами 3 минг 665 гектар ер майдонини Наманган шаҳри таркибига ўтказиш назарда тутилмоқда.

Шунингдек, Андижон вилоятининг Хонобод шаҳрига 1972 йилда асос солинган бўлиб, аҳолиси 41 минг кишини, умумий ер майдони 23 квадрат километрни ташкил этади. Бугунги кунда Хонобод шаҳри ҳудуди кичиклиги сабаб ишлаб чиқариш ва хизмат кўрсатиш объектларини барпо этишга етарлича имкон берилмаяпти. Шу боис, Қўрғонтепа туманидаги тўртта – “Султонобод”, “Хонобод”, “Ш.Рашидов” ва “Авазматов” мавзеларида жойлашган жами 1 минг 284 гектар ер майдонини Хонобод шаҳри таркибига ўтказилиши шаҳар аҳолисига қулай шароит яратади. Бу эса шаҳарнинг ижтимоий-иқтисодий салоҳиятини ошишига хизмат қилади.

Таъкидланганидек, мазкур чегараларини ўзгартириш ҳудудларнинг янада тараққий этишига хизмат қилади.

Масала сенаторлар томонидан маъқулланди.

3 248
А.МУСАЕВ, Т.МАМАДАМИНОВ (сурат), ЎзА