ЎзА Ўзбек

12.07.2018 18:58 Чоп этиш версияси

Гулистоннинг обод маҳаллалари

Сирдарё вилоятининг маркази Гулистон шаҳридаги Обод юрт ва Сайқал маҳаллаларида “Обод маҳалла” дастури ижроси доирасида кенг кўламли бунёдкорлик ва қурилиш-ободонлаштириш ишлари амалга оширилмоқда.

Гулистон шаҳар ҳокимининг қурилиш масалалари бўйича ўринбосари Жонибек Яриевнинг айтишича, ушбу маҳаллалар йиллар давомида эътибордан четда бўлгани боис кўплаб муаммолар йиғилиб қолган эди. Шунинг учун бош режага мувофиқ, айнан мазкур маҳаллаларнинг “Йўл харитаси” ишлаб чиқилиб, амалга оширилиши лозим бўлган ишлар белгилаб олинган.

Обод юрт маҳалласи Гулистон шаҳар ички ишлар бўлими бошлиғи З.Қаюмов, Сайқал маҳалласи шаҳар давлат солиқ инспекцияси бошлиғи Н.Шайдуллаев раҳбарлигидаги сектор тасарруфида.

Дастурга асосан маҳаллаларда 56 миллиард сўмликдан ортиқ бунёдкорлик ишлари амалга оширилади. Хусусан, ҳаммом, савдо мажмуалари, автомобилларга техник хизмат кўрсатиш шохобчалари, бўш турган давлат объектлари негизида тикув цехлари, пойабзал таъмирлаш устахоналари ва бошқа хизмат кўрсатиш масканлари ташкил этилиши кўзда тутилган.

Бош режага мувофиқ, ҳудуддаги 10 километр пиёдалар йўлаги, 11 километр ирригация тизими реконструкция, 3 километр квадрат майдонда ободонлаштириш ишлари амалга оширилиб, 1 суғориш қудуғи қазилади, шунингдек, чиқинди йиғиш майдончалари барпо этиш, мавжудларини таъмирлаш режалаштирилган.

Обод юрт ва Сайқал маҳаллаларидаги 5 та кўп қаватли, якка тартибдаги 86 та уйнинг том қисмини, 38 кўп қаватли, якка тартибдаги 99 уйнинг фасад қисмини таъмирлаш, 42 та кўп қаватли уйнинг ер тўласида муҳандислик ва коммуникация ишлари амалга оширилади. Шунингдек, умумтаълим мактаблари ва мактабгача таълим муассасаларини, 9 километрлик автомобиль йўлларини, 3 километрлик ичимлик суви ва оқова сув тармоғини мукаммал таъмирлаш режалаштирилган. Электр энергияси таъминотини яхшилаш мақсадида мавжуд трансформаторлар таъмирланиб, айримлари янгисига алмаштирилади. Кўчаларга тунги ёритгичлар ўрнатилиб, замонавий интернет тармоғи тортилади, 25 дона видеокузатув камераси билан таъминланади.

– Обод юрт ва Сайқал маҳаллалари ёнма-ён – шаҳримизнинг 3-мавзесида жойлашган, – дейди 3-сектор раҳбари, шаҳар ИИБ бошлиғи, подполковник З.Қаюмов. – Ҳар икки маҳалла аҳолиси амалга оширилаётган ишларда фаол иштирок этмоқда. Шаҳар ИИБ секторидаги Обод юрт маҳалласида шу кунгача 41 ноқонуний ва ўзбошимчалик билан қурилган объект бузилиб, 867 куб қурилиш чиқиндилари белгиланган жойга чиқариб ташланди. Қурилмалар ўрни тозаланиб, жойига тупроқ тўшалди, ҳозир у ерда кўкаламзорлаштириш ишлари олиб борилаётир.

Эътиборлиси, бунёдкорлик-ободонлаштириш ишларида аҳоли, жумладан, уюшмаган ёшлар ҳам фаол иштирок этмоқда. Ҳар ҳафта якшанба куни маҳаллада ҳашар уюштирилиб, тадбиркорлар томонидан бепул тушлик берилмоқда.

“Обод маҳалла” дастури доирасида амалга оширилаётган кунлик ишлар Гулистон шаҳар ҳокимлиги томонидан ташкил этилган штабда муҳокама қилиб борилади. Бир қарашда ҳамма иш рисоладагидек кўринади. Аммо амалга оширилаётган ишларда шижоат етишмаётгандек. Ёз ўтиб, ёмғирлар мавсуми бошлангунига қадар фурсатдан фойдаланиб қолиш керак. Негаки, Гулистон шароитида ёғин-сочинли кунларда қурилиш-таъмирлаш ишлари олиб бориш катта машаққат талаб қилади.

Абдужалол Қаюмов, ЎзА
6 585