ЎзА Ўзбек

11.05.2019 Чоп этиш версияси

Фарғонада тошдан қоғоз ишлаб чиқарилади

Фарғонада тошдан қоғоз ишлаб чиқарилади

ПРЕЗИДЕНТ ТАШРИФИДАН СЎНГ. Фарғона вилоятида 2019-2020 йилларда қиймати 40,4 триллион сўм бўлган 624 та йирик ва ўрта инвестиция лойиҳалари ишга туширилиши белгиланган бўлиб, улар негизида 49 мингдан зиёд иш ўрни яратилади. 

Мамлакатимизда ҳудудларда инвестиция лойиҳаларини амалга ошириш, тўғридан-тўғри хорижий инвестицияларни жалб этиш ва ўзлаштириш борасида тизимли ишлар олиб борилмоқда. Фаол инвестициялар ва ижтимоий ривожланиш йилида мазкур йўналишдаги ишларнинг кўлами янада кенгаймоқда. Давлатимиз раҳбари 6-7 май кунлари Фарғона вилоятига ташрифи чоғида амалга оширилаётган инвестиция лойиҳалари билан танишиб, бу борадаги долзарб вазифаларни белгилаб берди. Вилоятга инвестиция олиб келиш, саноат ва тадбиркорликни ривожлантириш бўйича бир йил фавқулодда сафарбарлик эълон қилинди.

Айни кунларда Фарғона шаҳрида Жанубий Кореянинг “Chung Construction Design Group” компанияси инвестицияси ҳисобига 500 ўринли беш юлдузли меҳмонхона, замонавий савдо ва бизнес анжуманлар ўтказиш мажмуаси барпо этиш ишлари бошланмоқда. Қўқон шаҳридаги “Йигитов клиник” хусусий корхонасида инновацион хирургия маркази, Фарғона туманидаги “Фергана франц” қўшма корхонасида “Welcome to Uzbekistan” бренди остида эко ва вино туризмини ташкил этиш, Данғара туманидаги “Агро грин сити” масъулияти чекланган жамиятида 12 гектар ер майдонига гидропоника усулида иссиқхона, Олтиариқ туманидаги “Eco export Trade” масъулияти чекланган жамияти томонидан логистика маркази ташкил этиш лойиҳалари ишга туширилади.

4.JPG

Жорий йилда Инвестиция дастурига киритилган ҳудудий лойиҳаларни амалга оширилиши ҳисобига вилоят иқтисодиётига жалб этиладиган тўғридан-тўғри хорижий инвестициялар миқдорини 42 та лойиҳаларда 312,7 миллион долларга етказиш учун аниқ чора-тадбирлар ишлаб чиқилди.

Айни кунларда Фарғона шаҳрида хитойлик ишбилармонлар билан ҳамкорликда тошдан экологик тоза қоғоз ишлаб чиқариш инновацион лойиҳаси амалга оширилмоқда.

Маълумотларга қараганда, мамлакатимиздаги қоғоз хомашёсига бир йиллик эҳтиёж жами 350 минг тонна бўлса, шундан 120 минг тоннадан зиёди офсет ва газета қоғозидир. Китоб, журнал, газета, ўқув дафтари, офис қоғози ва бошқа оқ қоғоз ва босма маҳсулотлари айнан офсет ва газета қоғозидан ишлаб чиқарилади. Қоғоз маҳсулотлари асосан хориждан олиб келинмоқда. Мазкур лойиҳа эса импорт ўрнини камайтириш, маҳаллий хом ашёдан сифатли маҳсулот ишлаб чиқариш билан аҳамиятлидир. Фарғона вилояти ҳокими Ш. Ғаниев 25-27 апрель кунлари Хитойда бўлиб ўтган “Бир макон, бир йўл” халқаро форумида иштирок этиб, лойиҳани амалга ошириш бўйича меморандум имзолаган.

Инновацион лойиҳанинг умумий қиймати 7 миллион доллар бўлиб, у Хитойнинг «Ningbo Stone Paper Environmental Friendly Materials Co.LTD» компанияси ва “Сайқал” савдо ишлаб чиқариш корхонаси билан ҳамкорликда амалга оширилмоқда. Замонавий технологиялар асосида фаолият кўрсатувчи корхона ишга тушгач, бир йилда бу ерда 9 минг тонна қоғоз ишлаб чиқарилиб, 60 та янги иш ўрни яратилади.

6.JPG

–Бугунги кунда сифатли тош қоғоз маҳсулотларига талаб бутун дунёда ортиб бормоқда, – дейди лойиҳа ташаббускори Абдураҳмон Ниёзов. – Сабаби унда экологияга ҳеч қандай зарар етмайди, балки оддий тош ёки кальцийдан фойдаланилади. Лекин тош қоғознинг сифати целлюлоза қоғозникидан бутунлай фарқ қилади. Биз юртимиздаги қоғоз хом ашёсига бўлган бир йиллик эҳтиёжни ўрганиб чиқдик. Китоб, журнал, газета, ўқув дафтари, офис қоғози ва босма маҳсулотлари айнан офсет ва газета қоғозидан ишлаб чиқарилади. Матбаа корхоналарида асосан чет эл қоғозлари ишлатилади. Мазкур лойиҳа ишга тушгач эса, ўзимизнинг маҳаллий хом ашёдан экологик тоза қоғоз ишлаб чиқарилади. Ички бозор билан биргаликда ташқи бозорга ҳам маҳсулотлар экспорт қилинади. Давлатимиз раҳбарининг вилоятимизга ташрифи чоғида инновацион лойиҳамизнинг тақдимотини щтказган эдик.

7 516
М.СУЛАЙМОНОВ, М.ҚОДИРОВ (сурат), ЎзА​