ЎзА Ўзбек

14.08.2018 18:14 Чоп этиш версияси

Бугунги кунда мамлакатимизда 20 миллиондан ортиқ фуқаро турли ННТлар аъзолари ҳисобланади

Бугунги кунда мамлакатимизда 20 миллиондан ортиқ фуқаро турли ННТлар аъзолари ҳисобланади
Мамлакатимизда нодавлат нотижорат ташкилотлари фаолият юритиши учун барча шароит яратилмоқда. Натижада уларнинг сони йилдан-йилга ортиб, фаолият кўрсатиш соҳалари ҳам кенгаймоқда. Қиёслаш учун: 1991 йилда юртимизда 100 га яқин ННТлар бўлган бўлса, ҳозирда 9 минг 478 тани ташкил этмоқда. 

Шунингдек, адлия органларида 16 та диний конфессияга мансуб 2 мингдан ортиқ диний ташкилот ва 235 та доимий фаолият кўрсатувчи ҳакамлик судлари рўйхатдан ўтказилган бўлиб, улар таркибида 715 та судья фаолият юритаётир.

Нодавлат нотижорат ташкилотлари ижтимоий-иқтисодий, маданий-маърифий соҳанинг турли йўналишларида, хусусан, тадбиркорликни, спортни ривожлантириш, экологияни асраш, имконияти чекланган шахсларни ижтимоий қўллаб-қувватлаш каби турли соҳаларни қамраб олмоқда.

ННТларнинг ишчи ўринлари яратишдаги ўрнига эътибор қаратадиган бўлсак, жорий йилнинг 1 февраль ҳолатига 55 мингдан ортиқ ходим, шундан 21 мингдан зиёди жамоатчилик асосида ишламоқда. Жамоатчи ходимлари энг кўп бўлган ташкилотлар сифатида Ўзбекистон соғлиқни сақлаш ходимлари касаба уюшмаси, Ўзбекистон таэквондо ассоциацияси, “Шарқ аёли“ халқаро аёллар жамоат фонди кабиларни келтириш мумкин.

Нодавлат нотижорат ташкилотлари ўз фаолиятини кенг оммага етказиш ва фаолиятининг ошкоралигини таъминлаш мақсадида оммавий ахборот воситалари, ўзининг моддий-техник базасини мустаҳкамлаш ҳамда фаолиятининг доимийлигини таъминлаш мақсадида 100 дан ортиғи тадбиркорлик субъектларини таъсис этган.

Шунингдек, 20 миллиондан ортиқ фуқаро турли ННТлар аъзолари ҳисобланади. Мисол учун, Ўзбекистон ёшлар иттифоқида 10 миллиондан ортиқ бўлса, “Ёшлик“ жисмоний тарбия ва спорт жамиятида 3 миллиондан зиёд, Ўзбекистон агросаноат мажмуи ходимлари касаба уюшмасида эса қарийб 2 миллион аъзо бор. 

Адлия вазирлигидан олинган маълумотларга кўра, ўтган йили ННТларнинг ҳисоб рақамларига 1 триллион 864 миллиард 358 миллион сўмдан ортиқ маблағ тушган. Мазкур маблағлар жойларда ижтимоий аҳамиятга эга масалаларни ҳал этишга сарфланмоқда.

Хусусан, 2 минг 224 нафар ёлғиз, ногиронлиги мавжуд, кам таъминланган кексаларга 345,6 миллион сўмлик моддий ёрдам ва 117,1 миллион сўмлик дори-дармон харид қилинган. Фавқулодда вазиятларда тўғри ҳаракатланиш ва унга тайёргарлик кўриш мавзусида қарийб 40 минг нафар фуқаро ўқитилди. Қорақалпоғистон Республикаси, Самарқанд, Андижон, Навоий, Фарғона, Қашқадарё ва Тошкент вилоятларида 48 эндокринолог хонаси жиҳозланди, 612 нафар умумий амалиёт шифокори ва 156 нафар мутахассис ўқитилди, хавфли гуруҳга кирувчи 954 мингдан ортиқ шахс бепул скрининг текширувдан ўтказилди. Яна кўплаб, суннат ва никоҳ тўйлари ўтказилди. Оилаларнинг уй-жойлари таъмирланиб, маиший техникалар етказиб берилди.

Қисқача айтганда, нодавлат нотижорат ташкилотлари кўплаб хайрия тадбирлари ўтказиб, кам таъминланган оилаларни қўллаб-қувватламоқда.

ЎзА
6 254