Размер шрифта: A A A
Цвет сайта: A A A A

18.07.2018 16:03 Чоп этиш версияси

Битта эчкидан 5 литр сут олиш мумкинми?

Битта эчкидан 5 литр сут олиш мумкинми?
Йилқичилик билан шуғулланиб келаётган “Бухоро Темур отлари” масъулияти чекланган жамияти янги йўналиш – эчкичилик тармоғида ҳам яхши натижаларга эришмоқда.

Жамиятга ўтган йили ёзда Польшадан 400 бош Альп ва Заанин зотли эчкилар келтирилди. Бунда тадбиркорга банк томонидан ажратилган 1 миллиард сўм миқдоридаги кредит қўл келди.

– Эчки сути таркибида оқсил мўллиги, ёғлилик даражаси юқорилиги билан аҳамиятлидир, – дейди “Бухоро Темур отлари” МЧЖ раҳбари Акмал Ғуломов. – Хориждан келтирилган зотли эчкилар ўзимиздаги жайдари турдошларига нисбатан маҳсулдорлиги билан ажралиб туради. Дастлаб, жониворлар бизнинг иқлимга мослаша олмайди, дегувчилар ҳам бўлди. Соҳа мутахассислари ва польшалик ҳамкорлар билан маслаҳатлашиб, эчкиларни маҳаллий иқлим хусусиятларини ҳисобга олган ҳолда парвариш қилдик. Меҳнат бесамар кетмади – эчкилар шароитга мослашди. Натижа шубҳаларга ўрин қолдирмайдиган даражада яхши бўлди.

Жорий йил баҳорда 200 бош улоқ олинди. Бу эчкиларнинг маҳаллий иқлимга мослашуви тажрибадан ўтган дастлабки йил учун яхши кўрсаткич. Бугун улоқлар дуркун ўсмоқда. Ҳозирда ҳар бир эчкидан кунига 2,5 литрдан ортиқ сут соғиб олинмоқда.

Шифобахшлик хусусиятига ҳам эга эчки сутининг бозори чаққон. Маҳсулотнинг асосий қисми аҳолига сотилмоқда. Бир қисми қайта ишланиб, қатиқ, қаймоқ тайёрланмоқда.

Эчкиларнинг иқлимга тўла мослашадиган навбатдаги авлодида маҳсулдорлик янада юқори бўлади. Мутахассислар фикрича, кейинчалик ҳар бир бош эчкидан кунига ўртача 5 литрдан сут соғиб олиш мумкин экан. 

Шунинг учун ҳам корхона раҳбарияти сутни қайта ишлаш замонавий технологияси билан жиҳозланган цех ташкил этиш ва тайёрланадиган сариёғ, қатиқ, пишлоқ, бринза каби маҳсулотларни ички бозорга, кейинчалик эса экспортга чиқариш режаси устида ишламоқда. Ҳозир корхонада 10 киши меҳнат қилаётир. Ишлаб чиқариш лойиҳаси амалга ошиши ва туёқ сони кўпайиши жараёнида яна 15 янги иш ўрни яратилади.

Хориждан келтирилган зотли эчкиларнинг вазни ҳам оғир. Гарчи улар асосан сут учун боқилса-да, яхши парваришланганда ҳар бири ўртача 70 килограммгача тош босиши мумкин.

Албатта, маҳсулдорлик бевосита озуқа базасига ҳам боғлиқ. Бу борада тадбиркорда муаммо йўқ. Туман ҳокимлиги корхонага 30 гектар унумдор ер ажратган. Бу ерда беда ва тариқ етиштирилмоқда.

Президентимиз жорий йил февраль ойида Бухоро вилоятига ташрифи чоғида кўплаб лойиҳалар қаторида “Бухоро Темур отлари” МЧЖнинг замонавий эчкичиликни ривожлантиришга оид режаси билан ҳам танишган эди. Лойиҳа муҳокамасида туёқ сонини кескин ошириш ва олинган зотли эчкиларни бошқа туманлар, умуман, юртимизнинг турли ҳудудларига етказиб бериш вазифаси қўйилди. Айни пайтда корхонада бу йўналишда ҳам ишлар бошлаб юборилган. Масалан, вилоятнинг қатор фермер хўжаликлари ўнлаб зотли эчкиларни ушбу янги йўналишдаги корхонадан харид қилди.

Эркин Ёдгоров, ЎзА
5 878