Наманган вилояти Чортоқ туманининг “Оромгоҳ” маҳалласида яшовчи Фарҳод Алимбоев ўрта мактабни тамомлаган холос.

Наманган вилояти Чортоқ туманининг “Оромгоҳ” маҳалласида яшовчи Фарҳод Алимбоев ўрта мактабни тамомлаган холос. Лекин у томонидан яратилган техникалар бугун ишлаб чиқариш, қурилиш, илм-фан жараёнларида кенг фойдаланилмоқда.

Фотосуратдаги бу кичик трактор эса унинг энг катта ихтироларидан биридир. Мазкур транспорт воситаси бир неча вазифаларни бажаради.

– Ёшлигимдан устачилик, темирлар билан ишлашга қизиқаман, - дейди Фарҳод Алимбоев. – Тракторлар ясашни тўрт йил олдин бошланганман. Экскаватор, юк ортадиган тракторлар қиммат бўлгани учун ушбу транспорт воситаларини ўзим ясаб кўришни мақсад қилганман. Қишлоқ шароитига мос келадиган тракторнинг вазни 2 тонна 300 бўлиб, пропан газида юради. Ушбу кичик техникада бир нечта вазифани бажарса бўлади.

 Хусусан, ундан йўлларни текислашда фойдаланса бўлади, 1 тоннагача бўлган юкни кўтаради, ковушларини алмаштирсак асфальтни текислайди, шағал ва цементни ўзи ковушига олиб аралаштиради, 2,5 метр баландликка кўтариб, тайёр опалубкага қуйиб беради. Тракторнинг контейнер темирлари, рамаларини бозордан сотиб олганман. Швеллер, дискаларини ўзим ясаганман, мотори эса “ВАЗ-2106” автомашинадан олиб қўйилган. Айни пайтда ижарага олинган кичикроқ устахонада фаолият юритяпман. Агар давлатимиз томонидан менга ишонч билдирилиб, ихтиро қилишим учун жой ва маблағ ажратилса мен қишлоғимизнинг 100 га яқин ишсиз ёшларнинг бандлигини таъминлаган бўлар эдим.

Қаҳрамонимизнинг фикрлари, янги ғояларини тинглаб шунга амин бўлдикки, юртимиз ёшлари буюк аждодларимиз, олиму уламоларимизга муносиб ворис сифатида янгиликлар яратишга иштиёқи баланд.