ЎзА Ўзбек

19.07.2018 20:12 Чоп этиш версияси

Асрни қаритган дарахтларни асрайлик

Пойтахтимизнинг Шайхонтоҳур тумани Ўрда канали яқинидаги 2 туп чинор дарахтининг ердан 4-5 метр баландликдаги қисми қолдирилиб, кесиб ташланган. Суриштирув натижасида ҳеч қандай рухсатномасиз, ноқонуний тарзда амалга оширилган ушбу ҳаракатга мутасадди ташкилотларнинг масъуллари томонидан йўл қўйилгани маълум бўлди.

Уларга нисбатан 46 миллион 100 минг сўм миқдорида жарима белгиланди.

Атрофимизни ўраб турган барча нарсалар: дарахтлар, қиру адирлар, тоғу тошлар, анҳорлар, сойлар – табиат инъоми, кимнингдир меҳнати маҳсули. Уларни асраб-авайлаш, келгуси авлодларга қолдириш эса бизнинг вазифамиздир.

Аммо буни англаб етмайдиган, ёки билиб туриб атай табиатга зиён келтирадиган фуқаролар ҳам бор. Тошкент шаҳар ҳокимлигида бир қатор ташкилотлар ҳамкорлигида “Пойтахтимизда қарийб бир аср яшаётган ва ундан ҳам зиёд умр кўраётган дарахтларни асраб-авайлаш ва уларнинг кесилишига қарши курашиш” мавзуида ўтказилган матбуот анжуманида шу ҳақда сўз борди.

Ёши улуғлар “Сувга тупурма, ариққа супурма, кўчага ахлат ташлама, кўкариб турган новдани нобуд қилма”, дея бежиз уқтирмаган. Қолаверса, халқимизда: «Бирни кессанг, ўнни эк», деган ҳикмат ҳам бор.

Аммо барчамиз бирдек бу яшил оламнинг қадрига етаяпмизми? Уни асраш учун қандай ҳисса қўшаяпмиз?

Бугун ўз манфаати, моддий фойда учун дарахтларни ноқонуний кесаётган юртдошларимизнинг борлиги ачинарли ҳол.

Жорий йилнинг олти ойи давомида Экология ва атроф-муҳитни муҳофаза қилиш давлат қўмитаси ҳузуридаги Биохилма-хиллик ва муҳофаза этиладиган табиий ҳудудларни муҳофаза қилиш ва улардан фойдаланишни назорат қилиш инспекцияси Тошкент шаҳар бўлинмасига Тошкент ва Сирдарё вилоятидан 4 минг 400 тупдан зиёд дарахт кесилишига оид 607 мурожаат бўлган. Шу мурожаатларнинг 404 таси рухсатнома асосида кесилаётгани маълум қилинган. 203 мурожаат эса ноқонуний ҳолда амалга оширилаётгани боис керакли чоралар кўрилган.

Ушбу муддат давомида пойтахтимизда ҳам соҳага оид ҳуқуқбузарликларни тезкор аниқлаш, тегишли чоралар кўриш юзасидан рейдлар ўтказилди. Жараёнда ноқонуний равишда дарахт кесишга йўл қўйилган ҳолатлар аниқланиб, қонунни бузган шахсларга нисбатан 95 ҳолатда 17 миллион сўмдан ортиқ жарима солинди. Айни вақтгача 10 миллион 100 минг миқдордаги жарима ундирилган.

Бундан ташқари, 86 ҳолатда 930 миллион сўмдан зиёд ўсимлик дунёсига етказилган зарар аниқланган ва 37 ҳолат бўйича 27 миллион 600 минг сўм миқдордаги жарима ундирилган. 

Табиатга етказган зарари учун 4 фуқарога нисбатан 361 миллион 500 минг сўм жарима белгиланди.

Экология ва атроф-муҳитни муҳофаза қилиш давлат қўмитаси ва Тошкент шаҳар ҳокимлиги ўртасида қўшма қарор тузилди. Унда белгиланишича жорий йилнинг 1 сентябридан бошлаб 1 туп кесилган дарахт учун 10 туп манзарали кўчат экиш белгиланди. Дарахтларни кесишда аввал битта ташкилот мутахассиси ўрганиб, хулоса чиқарган бўлса, эндиликда бу жараёнга мутасадди ташкилот ходими, маҳалла ва ҳудуддаги ТСЖ ходимлари ҳам жалб этилади.

Турли салбий ҳолатларнинг олдини олиш, келгуси авлод учун табиат неъматларини асрашда табиат, атроф-муҳитга бўлган муносабатни тубдан ўзгартириш лозим. Шундагина кутилган натижага эришиш мумкин.

Барно Мелиқулова, ЎзА
7 824