ЎзА Ўзбек

24.08.2018 16:48 Чоп этиш версияси

Андижонда хусусий мактаб иш бошлади

Андижонда хусусий мактаб иш бошлади Мамлакатимиз мустақиллигининг 27 йиллик байрами арафасида Андижон шаҳрида “Zahiriddin Muhammad Bobur Universal Academiy” деб номланган хусусий умумтаълим мактаби иш бошлади.

Вилоят ҳокимлигининг кўмаги билан Андижон миллий ҳунармандчилик ва ижтимоий иқтисодиёт касб-ҳунар коллежининг бўш турган биноси реконструкция қилиниб, мослаштирилган, замонавий кўринишга эга 600 ўринга мўлжалланган вилоятдаги илк хусусий умумтаълим мактабида инглиз, рус тиллари ҳамда математика фани чуқурлаштириб ўқитилади.

4.JPG

– Мактабимизда ўқувчиларнинг пухта билим олиши учун зарур шароитлар яратилган, – дейди муассаса раҳбари Нилуфар Ҳайдарова. – Мавжуд 27 ўқув хонаси бугунги кун талаби даражасида жиҳозланди. Айни кунда 2018/2019 ўқув йили учун 1-5 синфларга ўқувчилар қабул қилинмоқда. Уларга икки маҳал иссиқ овқат берилади, узоқдан келганлар ётоқхона билан таъминланади.

Ўқувчилар суҳбат асосида қабул қилиниб, иқтидорига қараб қайси йўналишда ўқиши аниқланади. Ўндан ортиқ тўгараклар ташкил этилиши кўзда тутилган. Дарс ва тўгарак машғулотларини малакали педагоглар ҳамда ҳиндистонлик тажрибали мутахассислар ўтади.

8 (1).JPG

Муассасанинг ўқув дастурлари, дарсликлар билан таъминланиши вилоят халқ таълими бошқармаси билан келишган ҳолда амалга оширилади. Таълим-тарбия жараёнида ўқувчи психологиясини ривожлантириш, эркин мулоқот қилиш кўникмасини шакллантириш, мактаб жамоаси ҳамда ота-оналар ҳамкорлигига алоҳида эътибор қаратилиши белгиланган. 

Фахриддин Убайдуллаев, Зуҳриддин Умурзоқов (сурат) ЎзА
11 596