ЎзА Ўзбек

31.08.2018 02:44 Чоп этиш версияси

Қўшма таълим дастурлари учун 15 сентябрга қадар ҳужжатлар қабул қилинади

Қўшма таълим дастурлари учун 15 сентябрга қадар ҳужжатлар қабул қилинади
Ўзбекистон Республикаси таълим муассасаларига ўқишга қабул қилиш бўйича Давлат комиссияси мажлисининг баёни билан Наманган давлат университети, Тошкент давлат иқтисодиёт ва Тошкент давлат аграр университетларига 2018/2019 ўқув йили учун хорижий олий таълим муассасалари билан қўшма таълим дастурлари асосида бакалавр ва магистрлар тайёрлаш бўйича қўшимча квоталар белгиланди. Бу ҳақида олий ва ўрта махсус таълим вазирлиги матбуот хизмати хабар бермоқда.

Жумладан, Наманган давлат университетида Россия Федерацияси Санкт-Петербург давлат педагогика университети билан ҳамкорликдаги қўшма дастур асосида 60 нафар талаба қабул қилинади.

Тошкент давлат иқтисодиёт университетида Урал давлат иқтисодиёт университети билан ҳамкорликда тўртта йўналишда 125 нафар, Тошкент давлат аграр университетида эса Волгоград давлат аграр университети билан биргаликда битта йўналишда 20 нафар талаба қўшимча қабул қилинади.

Қўшма дастурда белгиланган қабул квоталарида ўқиш тўлов-контракт асосида бўлиб, бакалавриат ва магистратурага абитуриентлардан ҳужжатлар шу йилнинг 15 сентябригача қабул қилинади.

Кириш имтиҳонлари олий таълим муассасалари томонидан шу йилнинг 17-22 сентябрь кунлари ўтказилади.

Имтиҳонлардан муваффақиятли ўтган абитуриентлар учун ўқиш истисно тариқасида жорий йилнинг 1 октябридан бошланади.

Қўшма дастур доирасида таълим оладиган талабалар ўқув жараёнини бир қисмини хорижий олий таълим муассасасида амалга оширади.

ЎзА
13 555