ҚҚС тўлаш муддати 120 кунгача кечиктирилиши мумкин
"Товарлар (ишлар, хизматлар)ни импорт қилишда қўшилган қиймат солиғи тўловчилар учун қўшилган қиймат солиғини тўлаш муддатини узайтириш тартиби тўғрисида"ги низом тасдиқланди.
Бугун Ўзбекистон Республикаси Вазирлар Маҳкамасининг қарори асосида "Товарлар (ишлар, хизматлар)ни импорт қилишда қўшилган қиймат солиғи тўловчилар учун қўшилган қиймат солиғини тўлаш муддатини узайтириш тартиби тўғрисида"ги низом тасдиқланди.
Янги ҳужжатга мувофиқ, қўшилган қиймат солиғи тўловчиси бўлган хўжалик юритувчи субъектлар энди товарларни олиб киришда, шунингдек, ишлар (хизматлар)ни импорт қилишда қўшилган қиймат солиғи бўйича имтиёз ўрнига 120 кунгача бўлган муддатга қўшилган қиймат солиғи тўлашни кечиктириш механизмларидан фойдаланиши мумкин.
Бунда ҚҚС тўлов муддатини узайтириш имконияти давлат божхона хизмати органининг қарори билан берилади. Бунинг учун солиқ тўловчилар божхона хизмати органига ариза, ҚҚС таъминланишини тасдиқловчи ҳужжатни тақдим этиладилар. Шундан сўнг беш иш куни мобайнида мурожаатни қаноатлантириш ёки рад этиш тўғрисида қарор қабул қилинади.