ЎзА Ўзбек

02.11.2012 12:47 Чоп этиш версияси

Ўзбекистон ва ЮНЕСКО ҳамкорлиги изчил ривожланмоқда

Ўзбекистон кўплаб нуфузли халқаро ташкилотлар билан самарали ҳамкорлик қилиб келмоқда. Ўзбекистон билан Бирлашган Миллатлар Ташкилотининг Таълим, фан ва маданият масалалари бўйича ташкилоти – ЮНЕСКО ўртасидаги муносабатлар алоҳида эътиборга лойиқ..

Мазкур ташкилотнинг асосий мақсади жаҳон халқлари ўртасида таълим, фан ва маданият, ахборот соҳаларида ҳамкорликни ривожлантиришдан иборат. Ташкилотга аъзо мамлакатларда ЮНЕСКО ишлари бўйича миллий комиссиялар тузилган.

Ўзбекистон ЮНЕСКОга 1993 йилда аъзо бўлган. 1996 йилда пойтахтимизда мазкур нуфузли ташкилотнинг ваколатхонаси иш бошлаган. Ўтган йиллар мобайнида Ўзбекистон ва ЮНЕСКО ўртасидаги муносабатлар изчил ривожланиб, ҳамкорликда кўплаб лойиҳалар амалга оширилди.

Президентимиз Ислом Каримов раҳнамолигида миллий ва маънавий қадриятларни тиклаш, ўрганиш ва тарғиб этиш, маданий ёдгорликларни, тарихий обидаларни, муқаддас қадамжоларни кўз қорачиғидек асраб-авайлаш, таъмирлаш ва келгуси авлодларга етказиш ҳамда аждодлардан қолган маданий ва маънавий меросни чуқур эҳтиром ва меҳр-муҳаббат билан қадрлаш борасида кўплаб хайрли ишлар амалга оширилмоқда. Мирзо Улуғбек таваллудининг 600 йиллиги, Амир Темур таваллудининг 660 йиллиги, Бухоро, Хива ва Термиз шаҳарларининг 2500 йиллиги, "Алпомиш" халқ достони яратилганининг 1000 йиллиги, "Авесто"нинг 2700 йиллиги, Шаҳрисабз шаҳрининг 2700 йиллик, Самарқанднинг 2750, Марғилоннинг 2000 ва Тошкент шаҳрининг 2200 йиллик юбилейлари нишонлангани ана шундай улуғвор ишлардандир. Ушбу тадбирлар ЮНЕСКО билан ҳамкорликда халқаро миқёсда кенг нишонланди.

ЮНЕСКО юртимизда ўтадиган кўплаб маданий тадбирларнинг меҳмони, ташкилотчиси ва иштирокчисидир. «Шарқ тароналари» халқаро мусиқа фестивалида ҳам ташкилот мунтазам қатнашиб келади.

ЮНЕСКОнинг Бирлашган мактаблар дастури тармоғи таълим соҳасидаги асосий дастур ҳисобланади. Дунёдаги олти мингдан зиёд мактаб Бирлашган мактаблар дастури аъзосидир. Ушбу дастурнинг асосий мақсади халқаро ҳамжиҳатлик, тинчлик, маданиятлараро мулоқот ва барқарор тараққиёт ғояларини тарғиб этиш ҳамда таълим сифатини оширишга қаратилган. ЮНЕСКО ишлари бўйича Ўзбекистон Республикаси Миллий комиссияси мамлакатимизда ушбу тармоқни ривожлантириш бўйича фаол иш олиб бормоқда. 1996 йилдан буён мазкур тармоққа юртимизнинг 45 таълим муассасаси аъзо бўлган. Мазкур таълим муассасалари бир қатор халқаро дастурларда муваффақиятли қатнашиб, "Таълим барча учун" мақсадларини ва БМТнинг барқарор тараққиёт таълими ўн йиллигини тарғиб этмоқда.

ЮНЕСКО томонидан 2003 йилда “Барқарорлик ва тараққиёт учун таълим 10 йиллиги” эълон қилинди. Бу борада мамлакатимизда ҳам кўплаб тадбирлар ўтказилмоқда. Ушбу дастур доирасида аҳолининг тил ўрганиш имкониятларини кенгайтириш, маънавият ва маърифат йўналишлари бўйича таълимни ривожлантириш, фан-техника ютуқларидан янада кенг фойдаланишни таъминлаш каби вазифалар изчиллик билан амалга оширилмоқда.

ЮНЕСКОнинг фан дастурлари доирасида биологик хилма-хилликни асраш ва табиий манбалардан оқилона фойдаланиш, ижтимоий ва иқтисодий ривожланишни қўллаб-қувватлаш, маданий қадриятларни ривожлантиришга бағишланган лойиҳалар амалга оширилди.

Маданий ва табиий меросни аниқлаш, муҳофаза қилиш ва сақлаш ЮНЕСКО фаолиятининг асосий йўналишларидан бири ҳисобланади. ЮНЕСКОнинг Жаҳон мероси дурдоналари рўйхатига қадимий Самарқанд ва Шаҳрисабз, Бухоро шаҳрининг тарихий маркази, Хивадаги Ичанқалъа мажмуи киритилган бўлиб, ташкилот уларни дунёга тараннум этишда муҳим ўрин тутмоқда.

Ўзбекистон билан ЮНЕСКО ўртасидаги ҳамкорлик қамрови кенгайиб бормоқда. Мамлакатимиз ушбу халқаро ташкилот билан фаол ҳамкорлик қилар экан, таълим, фан ва маданият соҳаларидаги алоқаларни ривожлантириш йўли билан жаҳонда тинчлик ва хавфсизликни мустаҳкамлашга ўзининг муносиб ҳиссасини қўшаверади.


ЎзА, Мадина Умарова
19 443