Президент Шавкат Мирзиёев Туркия парламентига ташриф буюрди
Ўзбекистон Республикаси Президенти Шавкат Мирзиёев Туркия Буюк миллат мажлисига ташриф буюрди.
Анқара, 26 октябрь. ЎзА махсус мухбири Анвар Самадов хабар қилади.Ўзбекистон Республикаси Президенти Шавкат Мирзиёев Туркия Буюк миллат мажлисига ташриф буюрди.
Буюк миллат мажлиси Туркия Республикасининг олий қонун чиқарувчи органидир. Унга 1920 йил 23 апрелда асос солинган.
2015 йилда ўтказилган парламент сайлови натижаларига кўра Мажлисда 4 партия ўз фракциясига эга. Адолат ва тараққиёт партияси вакили Исмоил Қаҳрамон унинг Спикеридир.
Президент Шавкат Мирзиёев Туркия Буюк миллат мажлиси Спикери Исмоил Қаҳрамон билан учрашди.
25 октябрь куни бўлиб ўтган олий даражада музокараларда парламентлараро ҳамкорликни ташрифлар алмашинуви ва қўшма тадбирлар ўтказиш орқали қўллаб-қувватлаш муҳимлиги қайд этилган эди. Мулоқотда мазкур йўналишдаги алоқаларни мустаҳкамлаш масалаларига эътибор қаратилди.
Ўзбекистон Республикаси Олий Мажлиси билан Туркия Республикаси Буюк миллат мажлиси ўртасида ҳамкорлик тўғрисида меморандум имзоланди.
Президентимиз Буюк миллат мажлиси биноси ва фаолияти билан танишди.
Шундан сўнг Президентимиз Истанбул шаҳрига жўнаб кетди.