Ўзбекистон Миллий ахборот агентлиги

07.09.2018 15:42 Чоп этиш версияси

“Sof tekstil“ ип йигирув фабрикаси​ йилига 5 минг тонна тўқимачилик маҳсулотлари ишлаб чиқариш қувватига эга​

“Sof tekstil“ ип йигирув фабрикаси​ йилига 5 минг тонна тўқимачилик маҳсулотлари ишлаб чиқариш қувватига эга​
Андижон вилоятининг Улуғнор тумани “Обод” маҳалла фуқаролар йиғинида “Sof tekstil“ ип йигирув корхонаси ишга тушди.

Ҳудудларда саноатни ривожлантириш, янги корхоналар барпо этиш, мавжудларини қўллаб-қувватлашга қаратилаётган алоҳида эътибор самарасида саноат маҳсулотлари ишлаб чиқариш ҳажми йилдан-йилга ортмоқда.

“Водий саноат фахри“ масъулияти чекланган жамияти негизида ташкил этилган “Sof tekstil“ ип йигирув фабрикаси ҳам ана шундай корхоналардан бири. Корхонага замонавий тўқув дастгоҳлари ўрнатилиб, илғор технологиялар билан жиҳозланди.

– Лойиҳани амалга ошириш учун 120 миллиард сўм маблағ сарфланди, – дейди корхона бош директори Сардор Умаров. – Корхонамиз йилига 5 минг тонна тўқимачилик маҳсулотлари ишлаб чиқариш қувватига эга. Маҳсулотларнинг 40 фоизи ички бозорда сотилади, 60 фоизи эса экспорт қилинади.

250 нафар хотин-қиз меҳнат қилаётган фабрикада ишчи-хизматчилар самарали ишлаши учун барча шароит яратилган.

– Касб-ҳунар коллежини бир неча йил аввал битирган бўлсам-да, ишсиз эдим, – дейди Шоҳиста Ҳотамова. – Мана энди маҳалламизда барпо этилган замонавий фабрикага ишга қабул қилиндим. Бундан оиламдагилар ҳам жуда хурсанд.

Ф.Убайдуллаев, ЎзА