Самарқанд автомобиль заводида корхона ташкил этилганлигининг йигирма йиллигига бағишланган тантанали маросим ўтказилди

Самарқанд автомобиль заводида корхона ташкил этилганлигининг йигирма йиллигига бағишланган тантанали маросим ўтказилди.

Бундан йигирма йил аввал, 1999 йил март ойида Самарқанд шаҳрида замонавий автобуслар ишлаб чиқарилиб, Самарқанд автомобиль заводининг тижорий фаолияти бошланган эди. Дастлаб Туркиянинг “Коч” компанияси билан ҳамкорликда заводда 2 русумдаги автобус, 3 русумдаги юк ташиш автомобиллари тайёрлаш йўлга қўйилди.

Кейинчалик “СамАвто” масъулияти чекланган жамияти Япониянинг “ISUZU Motors” компанияси ва “Itochu corporation” корпорацияси билан ҳамкорлик ўрнатди. Айни пайтда Самарқанд автомобиль заводида шаҳар ичида ва шаҳардан ташқарида ҳаракат қилишга мўлжалланган 7 турдаги замонавий автобуслар, 36 хил юк ва махсус автомобиллар тайёрланмоқда.

Энг муҳими, ўтган даврда самарқандлик автомобилсозлар ўз миллий маҳсулоти – LE60 паст шассели шаҳар автобусини яратиб, уни кенг кўламда ишлаб чиқармоқда.

Бугунги кунда корхонада 1200 дан ортиқ киши меҳнат қилмоқда. Шу пайтгача заводда 33 минг 700 дан ортиқ автобус ва юк машиналари ишлаб чиқарилди. Ушбу транспорт воситалари юртимизда ушбу турдаги автобус ва юк машиналарига бўлган эҳтиёжни қондириш баробарида Марказий Осиё давлатлари ҳамда Россия, Озарбойжон, Грузияга экспорт қилинмоқда.

Вилоят ҳокими Э.Турдимов завод жамоаси ва хорижлик ҳамкорларни корхона ташкил этилганлигининг 20 йиллиги билан табриклади. “СамАвто”нинг юртимиз иқтисодиётида тутган ўрнини эътироф этди ва завод раҳбариятига вилоят ҳокимлигининг эсдалик совғасини топширди.

Шунингдек, маросимда “ISUZU Motors” компанияси ва “Itochu corporation” корпорацияси вакиллари сўзга чиқиб, самарқандлик автомобилсозлар билан ҳамкорлик улар учун ҳар томонлама манфаатли эканлигини таъкидлаб, келгусида ишлаб чиқариш кўламини кенгайтириш ва маҳсулот турини янада кўпайтиришга тайёр эканликларини маълум қилди.

Завод ташкил этилишида фаол иштирок этган соҳа ходимлари ва ҳамкор ташкилотлар вакиллари ҳам жамоани қутлуғ сана билан муборакбод этди.

– Корхона ташкил этилганидан буён шу ерда меҳнат қилиб келаётганим билан фахрланаман, – дейди Самарқанд автомобиль заводи завод цех бошлиғи Шодихўжа Абулқосимов. – Ўтган йиллар давомида заводнинг оёққа туриб олиши, ишлаб чиқараётган маҳсулотларимизнинг халқаро бозорда ўз ўрнини топиши учун жамоамиз билан астойдил ҳаракат қилдик. Давлатимизнинг қўллаб-қувватлаши, хорижий ҳамкорларимизнинг ишончи туфайли бугун “СамАвто” минтақадаги давлатлар орасида автомобилсозлик саноатида муносиб ўринга эга бўлди. Келгусида бу салоҳиятни янада ошириш учун бор билим ва кучимизни ишга солиб ҳаракат қиламиз.

Тантанали маросимдан сўнг, япониялик ҳамкорлар Самарқанд вилояти ҳокимлиги ва “Ўзавтосаноат” компанияси вакилларига “ISUZU Motors” компаниясининг “D-MAX” автомобилини кўрсатиб, келгусида заводда ушбу турдаги автомашиналарни ҳам ишлаб чиқариш режалаштирилаётганини маълум қилди.