Hali pishiqchilik mavsumiga bir muncha vaqt bo‘lsa-da, bozorlarimizdagi mo‘l-ko‘lchilikni ko‘rib ko‘zingiz quvnaydi. Yangi sabzi, piyoz, kartoshka, karam chiqqaniga ancha bo‘ldi. Qulupnayu gilos bozor rastalarini to‘ldirdi.

Hali pishiqchilik mavsumiga bir muncha vaqt bo‘lsa-da, bozorlarimizdagi mo‘l-ko‘lchilikni ko‘rib ko‘zingiz quvnaydi. Yangi sabzi, piyoz, kartoshka, karam chiqqaniga ancha bo‘ldi. Qulupnayu gilos bozor rastalarini to‘ldirdi.

– Yaqinda qizimni uzatayapman. Osh uchun yangi sabzi oldim. Tilloday yaltirab turibdi. Ro‘zg‘or uchun qizilidan ham oldim, – deydi “Qo‘yliq dehqon bozori”da xarid qilayotgan Botir Jamolov. – Olma, noklar ham juda yaxshi saqlangan, narxi ham yozdagidek.

– O‘g‘limni shifokorga olib borgandim, dukkakli mahsulotlardan tayyorlangan turli salatlar bolalar sog‘lig‘i uchun foydali ekanini aytdi, – deydi yana bir xaridor Lola Barnoyeva. – Oila a’zolarimiz bilan turli loviyali salatlar, mosh solingan suyuq ovqatlarni xush ko‘rib iste’mol qilamiz. Ularning bahosi ham qimmat emas.

“Qo‘yliq dehqon bozori” rastalarini oralab, usti yopiq pavilyoniga kirar ekansiz, bu yerda sut, go‘sht, tuxum mahsulotlari va turli shirinliklar, xullas, kundalik turmush uchun zarur bo‘lgan barcha narsalar muhayyo ekanini ko‘rib quvonasiz. Rastalardagi go‘sht narxi 23-24 ming so‘m atrofida. Qassoblarning qo‘li-qo‘liga tegmaydi.

– Doimo shu yerdan go‘sht xarid qilaman, – deydi bektemirlik Ahror Jumayev. – Narx anchadan buyon bir me’yorda turgani bizni qoniqtiradi, go‘sht toza va sifatli.

Ha, bozordagi mo‘l-ko‘lchilik va narxlarning arzonligidan barcha mamnun. Avvallari qishdan sillasi qurib chiqqan aholi ayni bahor davrni “ilik uzildi” deya ta’riflagan. Prezidentimiz rahnamoligida amalga oshirilgan keng ko‘lamli islohotlar samarasida bu ibora esimizdan chiqib, tildan qolib bormoqda. Boisi qishloq xo‘jaligi tizimidagi serqirra o‘zgarishlar jarayonida bozorlarimiz to‘rt faslda ham sarxil meva-sabzavotlar bilan to‘ldirilmoqda.

“Chorsu dehqon bozori”da odatdagidek odam ko‘p. Uning darvozalaridan kirib-chiqayotganlarning keti uzilmaydi. Mahsulotlar sifatini nazorat qilish maqsadida laboratoriya ishlab turibdi. Doimiy arzonlashtirilgan qishloq xo‘jaligi mahsulotlari savdo yarmarkasida dehqonchilik va chorvachilik mahsulotlari xaridorlarga ma’qul narxlarda sotilmoqda. Savdo rastalari keng, baland va bahavo ayvonlar ostida joylashganligi bu yerdagilarni yozning issig‘iyu qishning yog‘in-sochinidan himoya qiladi. Uyda taom va shirinliklar tayyorlab sotadigan pazandalar uchun alohida rastalar ajratilgan.

– Bu yerdagidek mazali somsayu norinni hech qayerda yemaganman, – deydi olmazorlik Narzulla Quvondiqov. – Bozorlik qilish uchun kelganimda somsa ham xarid qilaman.

Bozor – yurt ko‘rki, to‘kinchilik ko‘rgazmasi, deb bejizga aytilmaydi. Meva-sabzavot rastalarini oralagan kishi yurtimizning uzumzoru bog‘larida, hosildor paykallarida sayr qilayotgandek sezadi o‘zini. Hunarmandlik, novvoylik kabi rastalar oralab qo‘li gul, mehnati halol xalqimizga tahsinlar aytsak arziydi.