ӨзА Қазақ

05.09.2020 Басып шығару нұсқасы

НАУАИ ҰНАТПАЙТЫН АДАМ

НАУАИ ҰНАТПАЙТЫН АДАМ
Өзбек халық ертегілерінен

Бірде Хүсейн Байқара сұлтан көмекшілерінің өсек сөзіне сеніп қалып, Әлішер Науаиді зынданға жаптырады. Артынан оның кінәсіз екені белгілі болып, сұлтан Хусейн шайырды қапастан босатыңдар деп пәрмен береді. Бірақ Науаи мұны орындағысы келмей, бәріне естіртіп "ол неғылған патша бір айтқан сөзінде тұрмайтын" деп, бостандыққа шығудан бас тартыпты. Ал, билеушінің бұйрығы салтанатта атылған оқтай талқылаусыз орындалатын болғандықтан сарай қызметшілері Науаиге "зынданнан шығыңызшы" деп қанша жалынса да, айтқандарына көндіре алмайды.

Болмаған соң Науидің жақын бір таныстарының ақылы бойынша, керемет бір мылжың кісіні тауып, оны ақынның жанына тастайды. Бір сағатқа жетпей-ақ ана мылжың ақымақ, өзінің бос әңгімесімен Науаидің миын ашытып, мезі қылғаны соншалық, шайыр екі қолын төбесіне қойып қашып кетуге шақ қалады. Ақыр соңында амал жоқ мынадай есуастан құтылу үшін, зынданнан шығуға келісім берген екен.

Өзбек тілінен аударған, Рашид БЕЙБІТҰЛЫ

8 361
ӨзА